عيد ميلاد أعز صديق

الصديق أعز شى في الوجود بعد الاباء و الاخوان بالرغم من قربة الشديد للدخول في معزة الاخوان و لكن عمر أحمد مصطفي و أحفظوا الاسم ده كويس لان أنا متاكد من إنه سيكون له شأن عظيم إن شاء الله إستطاع بالفعل أن يكون أحب الناس الي قلبي فهو من النعم التي أنعم بها علي ربي و الحمد لله عمر ده يا جماعة إنسان جميل بجد و شرف لاي شخص إنه يتعرف عليه مش يكون صحبة و الحمد لله أنا و هو أصدقاء منذ أكتر من 19 عاما و هو اليوم يحتفل بعيد ميلاده الرابع و العشرون و عقبال مائه عام يا أستاذ عمر
www.Tagreba.tk

مش فاهمين حاجة

بجد أنا حاسس إننا مش فاهمين حاجة ما هو بجد لازم واحد إبن حلال من بتوع السياسة المتنورين يطلع و يقول لنا إيه موضوع الإستفتاء ده يعني نروح ولا منروحش لو روحنا الجماعة بتوع المعارضة اللي بيبان عليهم إنهم خايفين علي الشعب و البلد حيزعلوا و لو مرحناش إيه اللي حيصل يعني ما هو أنا حاسس إن الاحسن إني ماروحش بس ليه طيب خليني معاكوا للاخر مش حاروح علشان الشروط أو البنود اللي إتعدلت في القرار 76 مش كفاية طب أوك....
طب إذا كا ن القرار ده ذات نفسه أصلا اللي إحنا مخدناش فيه حقنا لسه متوافقش عليه طب حعترض علي حاجة لسه متقررتش .....
أنا و بكل أمانة حتحيز المرة دي للون الرمادي يعني المفروض الإستفتاء ميكنش فيه نعم و لا بس ....
ده لازم يكون فيه خانة تالتة تقول لا لإن القرار مش منصف للشعب المصري ولو حد فاهم يا رييت يفهمني

موت العيون

موت العيون

إية اللي بيحصل الناس ملها ليه كلنا بنشوف الغش و الغلط و الظلم و نسكت.... قصدي بنتعمي.

أمشي في الشارع و تلاقي الواحد بيرمي الزبالة و لما تحاول تفهمه إن ده غلط ميصحش يقولك يعني هيه جت عليا" و دي مش أغنية سميرة سعيد " و الناس من حواليك مش متضايقين أو حتي مستائين. و كذلك من كل شي من العسكري اللي بيخدك مخلفة مع إنك راكن مظبوط و لما تحاول تفهمة إنه غلط يقول لك" فتح دماغك و كلك نظر يا بيه" طبعا ورقة من فئه الخمسة جنيه تحل لك كل مشاكلك طب أنا مش غلطان... طب و لو كنت غلطان برده حتدفع الخمساية و تعدي.

إظاهر إن إحنا خلاص عيونا ماتت لكن يا رب ما يكنش قلوبنا كمان حصلتها و رغم إني مليش في الشعر أو الزجل لكن لقيت إيدي بتكتب فقلت يلا خليها تكتب علي العموم يا جماعة حتي لو كانت وحشة غمضوا عينكم عنها يعني هي جت عليا

موت العيون

ليه يا دنيا بتعملي فينا كده

عيونا في أحوالك تعبت من كتر البكا

ده إحنا غلابة و عيشين في غابة

نروح و نيجي و مش عارفين

مين اللي يقدر ينظر سبيل

لعيون جميلة لكن حزينة

علي إيه؟؟ ما تعرف

يمكن قلوب...يمكن ظروف لكن أكيد

لو طال الزمان علي دي العيون

لازم حتعمي و لا حد ينفع يحيي اللي مات

غير اللي خلق الموت و الحياة

شلة أصحاب أيام المدرسة

أجمل حاجة في الدنيا بعد العيلة الأصحاب و الإنسان المحظوظ مش هو اللي يلاقي الاصحاب و خلاص لا ده اللي يلاقي الاصحاب في الوقت المناسب و في الفترة الحياتية المناسبة و أنا بصراحة بعتبر نفسي من المحظوظين جدا بصحابي واللي علي قد ما أقدر حاحاول أوصلهم كلمة بسيطة تعبر عن عشر محبتهم في قلبي و حيكون ترتيبهم حسب الفترة الزمنية لمهرفتهم و طبعا في النص حيكون في أشخاص عزاز جدا علي قلبي مش حقدر أسميهم أصحابي لكن عما بالفعل أستاتذتي اللي منكرش فضلهم عليه.
المرحلة الاولي (مرحلة المدرسة) "مدرسة النجاح لم ينجح أحد"
1- عمر أحمد محمد مصطفي :
أجمل إنسان في الدنيا كلها لو الدنيا كلها مفيهاش غيره يكون كفاية صحفي و فنان و شاعر و فوق كل ده إخلاص الدنيا فيه و ممكن تعرفوه أكتر من خلال البلوج بتاعه www.tagreba.tk
و أوعدكم إنكم حتدعولي لما تعرفوه
2- مايكل منير جرجس
شخصية غريبة الأكيد إنه إنسان هائل أنا أعرفة كويس من أيام المدرسة و صحيح إننا إفترقنا فترة لكن لما رجعت علاقتنا تاني لقيت في كمية تمرد غريبة لكنه زي زمان يمتلك إصرار مش عادي مايكل ده يا جماعة زي كتير من الشباب المصري ليه معدن من الماس لو فرضنا إن الماس أغلي شي مادي يبقي هو بس النظام و الروتين عملين زي الصدا بس هو صعب يصدي و لو كسل شويه متكنش بالنسبة لة نهاية الدنيا و رغم إنك مكمكن تعتقد إنه أكثر المتشائمين علي وجة الكرة الارضية إلا أنه غير ذلك تماما و يمتلك جانب كبير من الثقافة في نواحي عديدة وحاحاول أجيب البلوج بتاعة
3- ماجد عادل
ماجد عادل ده يا جماعة كان يمثل التفوق الدراسي بحق و حقيقي لكن الحقيقة
إني شخصيا بعتقد إن ماجد من أحسن الرسامين علي وجة الكرة الارضية و ده دون أي مجاملات و لو كنا عايشين في بلد تانية و عائلات تانية كان ماجد ده لازم يدخل كلية فنون جميلة و يكون بيكاسو و أحسن كمان بس يلا علي العموم هو إنسان طيب و محترم لكن إنقطعت علاقتي بيه من فترة كبيرة لكن أنا متأكد إننا حنتقابل تاني قريب .
4- محمد محمود محمد محمد عامر:
حقيقي من أعز الناس لقلبي أخويا الذي لم تلده أمي راجل وخدوم بمعني الكلمة لو طلبت منه أي خدمة لازم يعملها و لو علي حساب نفسه و لما تعرفة أكتر تحس إنه أرسطوقراطي بجد واد إبن ناس صحيح مشكلته الوحيدة في رأئي رغم أنها لا تعيبة إنه رومانسي للغاية و علي العموم لو حد عاوز حد يحكيلة مشاكله و أوجاعة و خصوصا لو كانت بنت عاوزة صداقة بجد صداقة نظيفة تعملي كومنت و أنا أديها الميل بتاعه و مش هتندم

ممكن أسال سؤال؟ هو إحنا إمتي ممكن نقول إننا نجحنا

ممكن حد يجاوبني إمتي تقدر تقول إنك نجحت؟
لما تنجح في الثانوية العامة و لا لما تنجح في الكلية و لا لما تشتغل و لا لما تتجوز ولا لما تخلف .
لما تنجح في الثانوية العامة في إحتمالين يتنجع بمجموع عالي يدخل كليه الناس بتقول إنها كلية كويسة يا إما تنجح بمجموع عالي برده بس ما يدخلش الكليه اللي الناس بيقولوا عليها و حنطنش بقيت الإحتمالات الأخري .
وبعد ما نخش أي كليه نفضل نعافر جواها علشان نخلصها و بعد ما نخلص نلاقي الصدمة الكبري مستنية و في الحقيقة هي مش صدمة واحدة هي صدمات بس مش مشكلة حنختزلهم لصدمة واحدة بس كبيرة شوية و حنداري الباقي وراها
طب كدة إحنا نقدر نقول إننا نجحنا!!!!!!!!
طب لما نشتغل كده نبقي نجحنا أنا مش متأكد من الموضوع ده لان أغلب اللي إشتغلوا مش مبسوطين و طالما إنهم من مبسوطين يبقي لسا منجحوش إلا القلة القليلة
و القلة القليلة دي برده مش شرط إنهم يكونوا حققوا النجاح الكامل لانهم ممكن يكونوا حققوا النجاح المادي فقط و ده السبب الوحيد اللي حيخليهم يدخلوا المرحلة اللي بعديها و هي مرحلة الزواج و طبعا كل المتزوجين حيكون ليهم ردين في المرحلة دي رد ما بينه و ما بين نفسة و رد ما بينه و ما بين زوجته طبعا أنتوا عارفين ليه .
المهم بجد أنا حاولت أفكر في إجابة للسؤال ده ملقتش إلا إجابة واحدة اللي عقلي المحدود وصلها و هي :
إن النجاح عبارة عن خط مستقيم بس متقطع يعني علي مراحل و إن كل واحد فينا بيمشي علي الخط ده و طبعا زي أي مارثون في الدنيا مش كل الناس بتكمل التراك للنهاية زي بالظبط مش كل الناس بتوصل لنهاية الخط المستقيم ده و اللي أكيد محدش حيوصل لاخرة في الدنيا بس اللي أكيد برده إن كلنا لازم نقطع منه شوط سواء كبير سواء صغير مش مشكلة المهم إننا نطول منه أي حاجة في دنيتنا دي .
فالاجابة اللي ريحتني نفسيا إن أنا لازم أفرح إن أنا مشيت حتي علي الخط ده حتي لو مخلصطوش المهم في كلمة واحد هي

الــــــــــــرضــــــــــــــــــا

مقدمة ليوميات نائب المدير في شركة ميما تك

أحب أعرفكم بنفسي
الأسم : سامح نبيل محمود محمد علي
تاريخ الميلاد : 6 / 8 / 1981.
المؤهل : بكالوريوس هندسة قسم إتصالات و إلكترونيات
الوظيفة الحالية : نائب رئيس مجلس إدارة شركة ميماتك للكمبيوتر
طبعا أنا عارف ان المقدمة ممكن تكون بايخة شويتين بس معلش إستحملوني
إمبارح لما قعدت أفكر مع نفسي شويه قلت جايز حاجة من اللي مإخرانا شوية إننا مبنكتبش مذكراتنا فققررت أجرب الفكرة اللي بإلها زمان

بتراودني ففكرت في إسم مناسب ملقتش غير يوميات نائب المدير في شركة ميماتك و ده طبعا لاني بقضي حوالي 18 ساعة في الشغل

سلام

لو عاوز تنجح لازم تفكر

عارفين يا جماعة إيه المشكلة. المشكلة في التفكير
و اوعوا تفتكروا من كلامي إني أقصد قلة التفكير لا ده أنا و أعود بالله من كلمة أنا أقصد كلا من التفكير الكتير و التفكير الإقليل.
يعني بالنسبه لي قعدت أفكر و أنا في ثانوي فالكلية اللي عاوز أخشها و رسيت علي هندسة و لو سائلتوني ليه هندسة بالذات حاقولك علشان بحب التكنولوجيا و خصوصا علم الإتصالات و لو سائلتوني تاني إشمعنا الإتصالات حقولكم بصراحة و لو أول مرة الإختيار ده كان بناء علي سببين :
1- إني كنت بتفكر إني حابب الهندسة.
2- إبن عمي كان مهندس إتصالات و عقبالي كده أول وظيفة ليه كانت في فودافون و طبعا أنتوا عارفين و اللهما لا حسد ( عربية شيروكي و خطيين موبايل و مرتب كويس ) و كل ده كان في سنة 1998 يعني قبل الدولار ما يغلي و الحياة تبقي ضنك زي دلوقتي.
و بعد ما خلصت الكلية إكتشفت أشياء خطيرة كتير و من أهمها:
· إني فعلا كنت بحب الأتصالات بس إكتشفت إني بحب الإدارة برضة.
· الحاجة المهمة أوي اللي إكتشفتها إن فودافون مبتعينش الا 2 مهندسين بالكتير في السنة.
طب دلوقتي السؤال هو أنا فكرت كتير ولا قليل و إذا وصلتم لنتيجة قولولي المشكلة في إني فكرت كتير ولا قليل؟
و علي العموم الحمد لله علي كل شي.

إن شاء الله حروح إسكندرية يوم الخميس

يا جماعة بالذمة مش حرام شاب يبقه أقصي طموحة انه ياخد يوم أجازة اللي هوه الخميس طبعا لان الجمعة مش أجازة علشان يسافر إسكندرية بس أنا خلاص قررت يوم الاربعاء مساء طيران علي الاسكندرية و أكيد حيكون معايا صحبي و حبيبي و أخويا عمر